Балаҕан ыйын 12 күнүгэр Хотун Төҥүлүгэ меценат Иван Борисов «Нал » музей-кафетын чөлүгэр түһэриигэ үһүс төгүлүн ыытыллар «Үйэни уҥуордаан» быыстапкаҕа коллекционердар муһуннулар. Бу тэрээһини меценат Иван Борисов, «Абылаҥ» коллекционердар түмсүүлэрэ уонна «Эйгэ» культура киинэ тэрийэн ыыттылар. Тэрээһиҥҥэ Мындааба сынньалаҥ киинигэр үлэлиир коллекционердар куруһуоктарын чилиэннэрэ баран кыттан кэллилэр. Куруһуок салайааччыта- Галина Чаптыкова.
Бороҕонтон «Умсулҕан» түмсүүлэр эмиэ сырыттылар.
Төҥүлү «Эйгэ» культура киинин төгүрүк саалатынан уонна хосторунан Мэҥэ-Хаҥалас, Чурапчы, Амма, Таатта, Уус-Алдан 80-тан тахса коллекционердарын быыстапката тилэри турда. Атыы-тутуу, мэнэйдэһии буолла.
Быыстапка үөрүүлээх аһыллыытыгар тэрийээччилэр уонна улуустартан кыттар делегациялар эҕэрдэ тыл эттилэр, «Нал»кафе музейыгар бэлэхтэрин туттардылар.
» Саамай былыргы коллекционнай мал», «Саамай кыра коллекционнай мал», «Саамай улахан коллекционнай мал», «Элбэх көрүҥ коллекциялаах кыттааччы» диэн күрэхтэр буоллулар.
Меценат Иван Борисов «Айылгы»балаҕаҥҥа кэлбит ыалдьыттарга бириистээх оонньуулардаах, эҕэрдэ кэнсиэрдээх сынньалаҥ сандалы остуолу тэрийдэ.
Мындааба коллекционердара быыстапкаҕа кыттан, биир санаалаахтарын кытта көрсүһэн, коллекция байытан үөрэн-көтөн кэллилэр. Сымнаҕас айаннаах Николай Чаптыков суоппарга, ГСМ хааччыйбыт олохтоох дьаһалтаҕа, баһылык Прокопий Румянцевка махталларын тиэрдэллэр.
