Алтынньы 28 күнүгэр Улуу Кыайыы 80, Мүрү нэһилиэгэ төрүттэммитэ 65 үбүлүөйдээх сыллар чэрчилэринэн, Мындааба бөһүөлэгэр ураты дьикти дьарыктаах дьон мустуулара буолла. Улуус «Умсулҕан» коллекционердар түмсүүлэрин ( салайааччы Станислав Луковцев, солбуйааччы Анна Федорова) уонна Мындааба СК коллекционердарын куруһуогун ( салайааччы Галина Чаптыкова) кыттыылаахтара кулууп саалатын тилэри быыстапкалара тардылынна, атыы-тутуу, атастаһыы, бэлэхтэһии күүскэ барда.
Быыстапка-дьаарбаҥка үөрүүлээх аһыллыытыгар Станислав Луковцев, Галина Чаптыкова эҕэрдэ тыл эттилэр, түмсүүлэр үлэлэрин туһунан кылгастык кэпсээтилэр. Ол кэннэ киин библиотека библиограба, коллекционер Мариянна Борисова Комсомол историятын экраҥҥа көрдөрөн туран, сырдатта. Олохтоох библиотекарь Наталья Портнягина бэлэмнээбит квиз-оонньуутугар кэлбит дьон билиилэрин тургутан көрдүлэр.
Эрдэ биллэриллибит экспонаттарынан күрэхтэр ыытылыннылар. Саамай кыра экспонаты көрүүгэ Анна Федорова, раритет экспонакка Вария Решетникова, ураты суолталаахха Мария Иванова, саамай ыарахан ыйааһыннаахха Иннокентий Крылов кыайыылаах таҕыстылар. Бу күрэхтэр дьүүллүүр сүбэлэрин председателинэн педагогическай үлэ ветерана Елизавета Сивцева үлэлээтэ.
Коллекционердар көрдөөх оонньууларга, таайбараҥнарга оҕолуу күлэ-үөрэ көхтөөхтүк кииристилэр. Күрэхтэр кыайыылаахтара бүгүҥҥү тэрээһин кыттыылаахтара аҕалбыт бириистэрин туттулар. Айаал Вырдылин, Станислав Луковцев толорууларыгар Людмила Андросова хоһоонугар, С.Луковцев дьүрүлүгэр Мындааба туһунан ырыаны кэрэхсии иһиттилэр.
Быыстапка-дьаарбаҥка түмүгэр икки түмсүү инники былааннар, бииргэ үлэлээһин туһунан сүбэлэстилэр.
