Тэрээһин үөрүүлээх чааһын Мүрү нэһилиэгин уус-уран самодеятельноһын кыттыылаахтара киэргэттилэр, В.Катаев » Цветик-семицветик» остуоруйатынан театрализованнай кэнсиэри көрдөрдүлэр. Сүрүн оруолларга Евдокия Аммосова, Матрена Заболоцкая, Ирина Портнягина, Оксана Бурнашева, Мындааба оскуолатын 1 кылааһын үөрэнээччилэрэ кытыннылар. Кэнсиэри Ксения Лукачевская, Павел Аммосов салайан ыыттылар. Мүрү нэһилиэгин баһылыга Прокопий Федотович Румянцев иһирэх эҕэрдэтин бар дьонугар тиэртэ, нэһилиэк оскуолаларын көхтөөх волонтер-үөрэнээччилэрин Махтал суруктарынан бэлиэтээтэ. Нэһилиэкпит бары уопсастыбаннай түмсүүлэрин биир ситимҥэ холбоон, саҥа кэрдиискэ таһаарар сыаллаах «Түмэр Мүрү» холбоһук тэриллибитинэн ыҥырыы таһаарда дьаһалта специалиһа Екатерина Михайловна Бочкарева. Бу күн Кыһыны атаарыы норуот бырааһынньыгын үгэһинэн араас күрэхтэр ыытылыннылар. Ол курдук, тэрилтэлэр, түмсүүлэр «В гостях у самовара» күрэххэ самовар арааһын көрдөрдүлэр, блины арааһын астаатылар. Түмүккэ, «Күндүүнэ» түмсүү 1-кы, «Маяк» түөлбэ 2-с, «Мындааба» түөлбэ 3-с миэстэлэри ыланнар үөрүүлэрэ үксээтэ. Саамай улахан самовардаах Мотрена Семеновна Москвитина «Красавец русский самовар» номинация кыайыылааҕа буолла. Бу самовар 1906 сылтан 6 улахан выставкаҕа кыттан анал бэлиэлэрдээх. Онтон «Самовар — раритет» уонна «Семья самоваров» номинациялар кыайыылааҕынан таҕыста Галина Власьевна Дегтярева. Кини 40-чэ самовардаах, коллекциятыгар урукку да, аныгы да араас омук эгэлгэ самовара баара сөхтөрдө. «Умсулҕан» түмсүу коллекционера Мария Андреевна Иванова уонна Мындааба «Мус-тал» коллекционера Варвара Федоровна Кривошапкина самовардара дьон кэрэхсэбилин ыллылар, анал номинацияҕа тигистилэр. Частушка толоруутугар 1-кы миэстэни «Күндүүнэ» түмсүү, 2-һи «Мындааба» түөлбэ ыллылар. Саамай күүтүүлээх күрэхтэргэ: «Хомуур хапсаҕай» күрэҕэр Ефимов Алик, «Ыараханы соһуу» — Копырин Володя, «Сыттыгынан киирсии» — Ефимов Алик, «Хаатыҥканан быраҕыы» — Окоемов Анатолий, оҕолор «Быаҕа таптарыма» күрэхтэригэр 25 оҕоттон Старостин Егор, «Кылыйан киирсии» күрэххэ 30 оҕоттон Федотов Сулус кыайыылааҕынан буоллулар. Маны таһынан, «Аһастаах киһи» күрэҕи «Сэргэх олох» түмсүү олус сэргэхтик ыытан саамай аһастаах киһинэн Мирослав Гоголевы ааттаатылар. Тэрээһин кэмигэр «Движение первых» кыттыылаахтара, С.С.Васильев- Борогонскай аатынан киин библиотека уонна Уус-Алданнааҕы нэһилиэнньэ социальнай көмүскэлин кэлим киинин специалистара кырачаан оҕолорбутугар оонньуу былаһааккаларын тэрийэннэр сааскы бырааһынньыгы ситэрэн, оҕолорго үөрүүнү үксэтэн биэрдилэр. Кыһыны атаарыы, сандал сааһы керсүү үгэс буолбут тэрээһини ыытыыга көмөлөспүт биирдиилээн дьоннорбутугар олохтоох дьаһалта аатыттан махтал суруктар туттарылыннылар.
